സി പി ഐ സംസ്ഥാന സമ്മേളന സെമിനാർ

നെയ്യാറ്റിൻകര: മതത്തിൻ്റെയും  ജാതിയുടെയും വിശ്വാസത്തിൻ്റെയും പേരിൽ ആളുകളെ പൊതു സമൂഹത്തിൽ നിന്നും അകറ്റി നിറുത്തിയിരുന്ന ഒരു ഭൂതകാലം നമുക്ക് ഉണ്ടായിരുന്നു. അതിൽ നിന്നും മനുഷ്യനെ മനുഷ്യനായി കാണാൻ പഠിപ്പിച്ചത് കമ്യൂണിസ്റ്റ് പാർട്ടിയാണ് എന്നും വന്യൂ വകുപ്പ്  മന്ത്രി കെ രാജൻ പറഞ്ഞു.         സി പി ഐ സംസ്ഥാന സമ്മേളനത്തോടനുബന്ധിച്ച് " നവോത്ഥാന കേരളം പിന്നിട്ട നാൾവഴികൾ " എന്ന വിഷയത്തിൽ നെയ്യാറ്റിൻകരയിൽ സംഘടിപ്പിച്ച സെമിനാർ ഉദ്ഘാടനം ചെയ്യുകയായിരുന്നു. നവോത്ഥാന പ്രസ്ഥാനമാണ് കേരളത്തിൻ്റെ മണ്ണ്  ഉഴുത്  മറിച്ചത്. നമ്മൾ ഇപ്പോൾ അനുഭവിച്ചുകൊണ്ടിരിക്കുന്ന എല്ലാ അവകാശങ്ങളുടെയും നേട്ടങ്ങളുടെയും നേർ അവകാശികൾ കമ്യൂണിസ്റ്റ് പാർട്ടിയാണെന്നും മന്ത്രി ഓർമ്മിപ്പിച്ചു.

 സെമിനാറിൽ യുവകലാ സാഹിതി സംസ്ഥാന പ്രസിഡൻ്റ് ആലംകോട് ലീലാകൃഷ്ണൻ മുഖ്യപ്രഭാക്ഷണം നടത്തി. സാംസ്കാരിക വിപ്ലവം നടത്തി ജനങ്ങളെ പ്രബുദ്ധരാക്കുന്ന ഏറെ ശ്രമകരമായ ദൗത്യമാണ് സാംസ്കാരിക, സാമൂഹ്യ പ്രവർത്തകർ ചെയ്ത് വരുന്നതെന്ന് ലീലാകൃഷ്ണൻ ഓർമ്മിപ്പിച്ചു. അണ്ണാ വൈകുണ്ഠ സ്വാമിയും ചട്ടമ്പിസ്വാമിയും അയ്യങ്കാളിയും നാരായണ ഗുരുവും പിടി ഭട്ടതിരിപ്പാടും വയലാറും തോപ്പിൽ ഭാസിയും ഉൾപ്പെടെ അനേകം പേർ ഈ സാംസ്കാരിക വിപ്ലവത്തിൻ്റെ പതാക വാഹകരായിരുന്നു.

ഭക്ഷ്യ സിവിൽ സപ്ലൈസ് വകുപ്പ് മന്ത്രി ജി ആർ അനിൽ, പാർട്ടി സംസ്ഥാന എക്സിക്യൂട്ടീവംഗം സി ദിവാകരൻ, ജില്ലാ സെക്രട്ടറി മാങ്കോട് രാധാകൃഷ്ണൻ, സംസ്ഥാന കൗൺസിലംഗം വി പി ഉണ്ണികൃഷ്ണൻ, ജില്ലാ അസിസ്റ്റൻ്റ് സെക്രട്ടറി പള്ളിച്ചൽ വിജയൻ, സംസ്ഥാന കൗൺസിലംഗം അരുൺ കെ എസ്, വി ശശി എം എൽ എ, ഡെപ്യൂട്ടി മേയർ പി കെ രാജു, കെ എസ് മധുസൂദനൻ നായർ, വെങ്ങാനൂർ ബ്രൈറ്റ്, ജയചന്ദ്രൻ കല്ലിംഗൽ, ആർ എസ് ജയൻ, മണ്ഡലം സെക്രട്ടറി എ എസ് ആനന്ദകുമാർ, ആൻ്റസ്, ശരൺ, ജി എൻ ശ്രീകുമാരൻ തുടങ്ങിയവർ സംസാരിച്ചു.