തലസ്ഥാനത്ത് പോലീസിനു നേരെ ബോംബേറ്
തിരുവനന്തപുരം : തിരുവനന്തപുരം കണിയാപുരത്ത് പൊലീസിന് നേരെ ബോംബേറ്. പണത്തിന് വേണ്ടി യുവാവിനെ തട്ടിക്കൊണ്ടുപോയ കേസിലെ പ്രതികളെ പിടികൂടാനെത്തിയ പൊലീസിന് നേരെയാണ് ബോംബേറുണ്ടായത്. തലനാഴിയ്ക്കിടക്കാണ് പൊലീസുകാര്ക്ക് രക്ഷപ്പെട്ടത്. അണ്ടൂര്ക്കാണം പായ്ചിറയിലുള്ള സഹോദരങ്ങളായ ഷമീര്, ഷഫീഖ് എന്നിവരുടെ വീട്ടിലെത്തിയപ്പോഴായിരുന്നു ആക്രമണം. ഭീകരാന്തരീക്ഷം സൃഷ്ടിച്ച പ്രതികള്, പൊലീസിന് നേരെ മഴുവും എറിഞ്ഞു.
പ്രതികളില് ഒരാളായ ഷമീറിനെയും ഇയാളുടെ അമ്മയെയും പൊലീസ് കസ്റ്റഡിയിലെടുത്തു. മറ്റൊരു പ്രതി സഹോദരനായ ഷഫീക്ക് ഓടി രക്ഷപ്പെട്ടു. പ്രതികളെ പൊലീസ് സ്റ്റേഷനിലേക്ക് മാറ്റിയതിന് ശേഷം പൊലീസ് സ്റ്റേഷനില് വെച്ചും നാടകീയ സംഭവങ്ങളുമുണ്ടായി. പൊലീസ് കസ്റ്റഡിയില് പ്രതി ഷമീര് ആത്മഹത്യക്ക് ശ്രമിച്ചു. പിടിയിലായ ഷെമീര് സെല്ലിനുള്ളില് വച്ച് ബ്ലെയ്ഡുകൊണ്ട് കഴുത്തില് പരിക്കേല്പ്പിക്കുകയായിരുന്നു. ഇയാളെ ആശുപത്രിയിലേക്ക് മാറ്റി.